മലയാളി ചലച്ചിത്ര പ്രേമികളുടെ മനസ്സിൽ ജയന്‍ ഒരു നോവായി മാറിയിട്ട് 2025 നവംബർ 16-ന് 45 വർഷം തികയുന്നു. 1980 നവംബർ 16-ന് ‘കോളിളക്കം’ എന്ന സിനിമയുടെ ചിത്രീകരണത്തിനിടെ ചെന്നൈ ഷോളാവാരത്ത് നടന്ന ഹെലികോപ്റ്റർ അപകടത്തിലാണ് മലയാളത്തിൻ്റെ പ്രിയപ്പെട്ട ആക്ഷൻ ഇതിഹാസം ജയൻ (കൃഷ്ണൻ നായർ) ഈ ലോകത്തോട് വിട പറഞ്ഞത്. മലയാള സിനിമയുടെ ചരിത്രം ‘ജയനും മുൻപ്’ എന്നും ‘ജയനു ശേഷം’ എന്നും വേർതിരിക്കാമെങ്കിലും, ജയനു ശേഷം ആ സ്ഥാനത്ത് മറ്റൊരാൾക്ക് ഇടം നേടാൻ കഴിഞ്ഞിട്ടില്ല എന്നത് അദ്ദേഹത്തിൻ്റെ വ്യക്തിമുദ്രയുടെ ആഴം വ്യക്തമാക്കുന്നു.
അതിഭാവുകത്വവും നാടകീയതയും നിറഞ്ഞാടിയിരുന്ന ഒരു കാലഘട്ടത്തിൽ, നടൻ സത്യനുശേഷം, സ്വതസിദ്ധമായ ശൈലിയിൽ രൗദ്രഭാവമുള്ള കഥാപാത്രങ്ങളെ അനായാസം അവതരിപ്പിച്ചാണ് ജയൻ ശ്രദ്ധേയനായത്. തൻ്റെ സിനിമകളിലെ ഡയലോഗുകൾ വളരെ ലാഘവത്തോടെയും സ്വാഭാവികമായുമാണ് അദ്ദേഹം അവതരിപ്പിച്ചത്.
പിൽക്കാലത്ത് മിമിക്രി വേദികളിൽ ജയൻ ശൈലി അതിഭാവുകത്വത്തോടെ അവതരിപ്പിക്കപ്പെട്ടെങ്കിലും, യഥാർഥത്തിൽ അദ്ദേഹം മലയാള സിനിമയിലെ ആക്ഷൻ രംഗങ്ങൾക്ക് ഒരു പുതിയ ഗതിമാറ്റമുണ്ടാക്കുകയും പുതിയ ആക്ഷൻ ഹീറോകൾക്ക് വലിയ പ്രചോദനമാവുകയും ചെയ്തു. പരിമിതമായ സാങ്കേതിക സാഹചര്യങ്ങളിലും സുരക്ഷാ ക്രമീകരണങ്ങൾ ഇല്ലാതിരുന്ന ലൊക്കേഷനുകളിലും ആനയോടും മുതലയോടും മൽപ്പിടുത്തം നടത്തിയ ഒരു നടൻ്റെ സാഹസികതയ്ക്ക് ഇന്നത്തെ കാലഘട്ടവുമായി താരതമ്യമില്ല.
ജയൻ്റെ ആകസ്മിക വിയോഗത്തിന് കാരണമായേക്കാവുന്ന ചില നിർണായക തീരുമാനങ്ങളെക്കുറിച്ചുള്ള വിവരങ്ങൾ ഇന്നും ചർച്ചയാകാറുണ്ട്.
ജയൻ മരണത്തിന് തൊട്ടുമുമ്പ് ‘അറിയപ്പെടാത്ത രഹസ്യം’ എന്ന ചിത്രത്തിൻ്റെ ചിത്രീകരണത്തിലായിരുന്നു. ആനയുമായുള്ള മൽപ്പിടുത്തത്തിൻ്റെ രംഗങ്ങളാണ് അവിടെ ഷൂട്ട് ചെയ്തിരുന്നത്. ഈ രംഗങ്ങൾക്കിടയിൽ ആനയുടെ ആക്രമണത്തിൽ നിന്ന് രണ്ടുപ്രാവശ്യം അദ്ദേഹം തലനാരിഴക്കാണ് രക്ഷപ്പെട്ടത്. ഈ ചിത്രീകരണം പൂർത്തിയാകുന്നതിനുമുമ്പ്, ‘കോളിളക്ക’ത്തിൻ്റെ ക്ലൈമാക്സ് പൂർത്തിയാക്കാനായി സംവിധായകൻ പി. വേണുവിനോട് ജയൻ നിർബന്ധിച്ച് അനുമതി ചോദിക്കുകയായിരുന്നു. പ്രൊഡക്ഷൻ കൺട്രോളർ ഇടുക്കി പീരുമേട്ടിലെ ലൊക്കേഷനിൽ എത്തിയാണ് അദ്ദേഹത്തെ ചെന്നൈയിലേക്ക് കൂട്ടിക്കൊണ്ടുപോയത്.
ഷൂട്ടിങ് ഷെഡ്യൂൾ അനുസരിച്ച് ‘അറിയപ്പെടാത്ത രഹസ്യ’ത്തിൽ നിന്ന് ഇടവേളയെടുത്ത് മറ്റൊരു സിനിമയിലേക്ക് പോകാൻ കഴിയാത്ത സാഹചര്യമായിരുന്നു. എന്നിട്ടും ജയൻ്റെ നിർബന്ധത്തിന് വഴങ്ങി സംവിധായകന് അനുമതി നൽകേണ്ടിവന്നു. ഹൈ റിസ്ക് ആക്ഷൻ രംഗങ്ങൾ ചെയ്യുമ്പോൾ സൂക്ഷിക്കണമെന്ന് സാക്ഷാൽ പ്രേം നസീർ അടക്കം അദ്ദേഹത്തെ ഉപദേശിച്ചിരുന്നുവെങ്കിലും, അതൊന്നും ചെവിക്കൊള്ളാൻ അദ്ദേഹം തയ്യാറായില്ല. തൻ്റെ കരിയറിലെ ഏറ്റവും വലിയതും വലിയ ബഡ്ജറ്റിലുമുള്ള ഒരു സിനിമ നിർമ്മിച്ച് അതിൽ കേന്ദ്ര കഥാപാത്രമാകാനുള്ള ഒരുക്കത്തിലായിരുന്നു ജയൻ ആ സമയത്ത്.
ജയൻ്റെ മരണത്തിന് തൊട്ടുമുമ്പുള്ള നാളുകളിൽ ചലച്ചിത്ര ലോകത്തെ ഏറ്റവും വലിയ ചർച്ചാവിഷയം ‘കർണ്ണൻ’ എന്ന ചിത്രമായിരുന്നു. വലിയ ബഡ്ജറ്റിൽ ചിത്രീകരിക്കാൻ ഉദ്ദേശിച്ച ഈ സിനിമ സംവിധാനം ചെയ്യാനിരുന്നത് ജയൻ്റെ നിരവധി ചിത്രങ്ങൾ ഒരുക്കിയ പി. ചന്ദ്രകുമാർ ആയിരുന്നു. നേരത്തെ കമ്മിറ്റ് ചെയ്ത സിനിമകൾ പൂർത്തിയാക്കേണ്ടതിനാൽ കർണ്ണൻ്റെ ആരംഭം നീണ്ടുപോവുകയായിരുന്നു.
ജയൻ്റെ തിരക്കുകൾ കാരണം പി. ചന്ദ്രകുമാർ കർണ്ണൻ്റെ ജോലികൾക്ക് ഇടവേള നൽകി സുകുമാരനെ നായകനാക്കി ‘അധികാരം’ എന്ന ചിത്രം ഗുരുവായൂരിൽ ചിത്രീകരണം ആരംഭിച്ചു.
നവംബർ 15-ന് രാത്രി തന്നെ ജയൻ ചെന്നൈയിലെ പ്രശസ്തമായ പാം ഗ്രൂവ് ഹോട്ടലിലെ 410-ാം നമ്പർ മുറിയിൽ എത്തിയിരുന്നു. എന്നാൽ ‘കോളിളക്ക’ത്തിൻ്റെ ക്ലൈമാക്‌സ് പൂർത്തിയാക്കാൻ സുകുമാരൻ അത്യാവശ്യമായിരുന്നു. നിർമാതാക്കളായ സുഗുണാ ഫിലിംസുമായി അത്ര നല്ല ബന്ധത്തിലായിരുന്നില്ല സംവിധായകൻ പി. ചന്ദ്രകുമാർ. ഷോളാവാരം എയർഡ്രോമിലെ പെർമിഷൻ ഒരു ദിവസത്തേക്ക് മാത്രമായതിനാൽ, ചിത്രീകരണം മുടങ്ങാതെ പൂർത്തിയാക്കാൻ ജയൻ നേരിട്ട് ചന്ദ്രകുമാറിനെ വിളിച്ചു. അന്നേരം തിയേറ്ററുകളിൽ വിജയകരമായി ഓടിക്കൊണ്ടിരുന്ന ജയൻ-ചന്ദ്രകുമാർ കൂട്ടുകെട്ടിലെ ‘ദീപം’ എന്ന സിനിമയുടെ പേരിൽ ജയന് വഴങ്ങി ചന്ദ്രകുമാർ സുകുമാരനെ ഒരു ദിവസത്തേക്ക് വിട്ടുകൊടുത്തു.
1980 നവംബർ 16-ന് രാവിലെ മുതൽ ഷോളാവാരത്ത് നിർത്താതെ മഴ പെയ്തത് ചിത്രീകരണത്തിന് തടസ്സമുണ്ടാക്കി. എന്തുവിലകൊടുത്തും ഷൂട്ടിംഗ് പൂർത്തിയാക്കേണ്ടതിനാൽ, മഴ നൽകിയ 40 മിനിറ്റോ ഒരു മണിക്കൂറോ മാത്രമുള്ള ഇടവേള ഉപയോഗിക്കാൻ തീരുമാനിച്ചു. അങ്ങനെ രാവിലെ ഏകദേശം 11 മണിയോടെ ജയൻ ഹോട്ടലിൽ നിന്നും ലൊക്കേഷനിലെത്തി.
അന്ന് ഉച്ചയ്ക്ക് 2:15 ഓടുകൂടിയാണ് ഹെലികോപ്റ്റർ അപകടത്തിൽപ്പെടുന്നത്. അപകടശേഷം ആശുപത്രിയിൽ എത്തിച്ചെങ്കിലും മലയാള സിനിമയുടെ ആക്ഷൻ ഹീറോയുടെ മരണം വൈകുന്നേരം 6:30 ഓടെ സ്ഥിരീകരിച്ചു.
ജയൻ്റെ ഭൗതിക ശരീരം ചെന്നൈയിൽ നിന്ന് നാട്ടിലേക്ക് കൊണ്ടുവരുന്നതിൻ്റെ എല്ലാ കാര്യങ്ങളിലും മുൻപന്തിയിലുണ്ടായിരുന്നത് സൂപ്പർതാരം പ്രേംനസീറിൻ്റെ മകൻ ഷാനവാസ് ആയിരുന്നു. ഇതിനായുള്ള മുഴുവൻ സാമ്പത്തിക സഹായവും നൽകിയത് പ്രേംനസീറായിരുന്നു.
ജയൻ്റെ മരണശേഷം ‘കോളിളക്കം’, ‘അറിയപ്പെടാത്ത രഹസ്യം’, ‘ആക്രമണം’, ‘മനുഷ്യമൃഗം’ തുടങ്ങി ഏകദേശം നാല് ചിത്രങ്ങൾ തിയേറ്ററുകളിൽ എത്തി, അവയെല്ലാം വലിയ വിജയങ്ങളായി. ജയൻ്റെ മാസ് ഡയലോഗുകൾ പ്രേക്ഷകർ ആവേശത്തോടെ ഏറ്റെടുത്തു. എന്നാൽ, ഈ ചിത്രങ്ങളിൽ ജയന് ശബ്ദം നൽകിയത് പ്രശസ്ത സംവിധായകനായ ആലപ്പി അഷ്‌റഫ് ആയിരുന്നു എന്ന വിവരം വർഷങ്ങളോളം പുറംലോകം അറിഞ്ഞിരുന്നില്ല. സിനിമയുടെ അണിയറ പ്രവർത്തകർ അതീവ രഹസ്യമായി ഈ സത്യം സൂക്ഷിച്ചു.
“ജയന് ശബ്ദം നൽകിയത് ഞാനാണ് എന്ന് ജനങ്ങൾ അറിഞ്ഞിരുന്നുവെങ്കിൽ അത് സിനിമകളുടെ ബോക്‌സ് ഓഫീസ് കളക്ഷനെ സാരമായി ബാധിക്കുമായിരുന്നു. ജയൻ കൊള്ളാം, പക്ഷേ ശബ്ദം മറ്റൊരാളുടേതാണല്ലോ എന്ന സ്വാഭാവികമായ അഭിപ്രായങ്ങൾ ഉയരുമായിരുന്നു,” എന്ന് ആലപ്പി അഷ്‌റഫ് പിന്നീട് ഒരു അഭിമുഖത്തിൽ ഇ ടിവി ഭാരതിനോട് വെളിപ്പെടുത്തിയിരുന്നു. ജനം തങ്ങളുടെ താരത്തെ രൂപംകൊണ്ടും ശബ്ദംകൊണ്ടും മരണശേഷവും ആഘോഷിച്ചു.
‘അറിയപ്പെടാത്ത രഹസ്യം’ എന്ന സിനിമയുടെ ചിത്രീകരണത്തിൽ നിന്ന് ഇടവേളയെടുത്താണ് ജയൻ ‘കോളിളക്ക’ത്തിൻ്റെ ക്ലൈമാക്സ് ഷൂട്ടിംഗിനായി ചെന്നൈയിലേക്ക് പുറപ്പെട്ടത്. പുറപ്പെടുന്നതിന് തൊട്ടുമുമ്പ്, ‘അറിയപ്പെടാത്ത രഹസ്യ’ത്തിൻ്റെ ആക്ഷൻ ഡയറക്ടർ ത്യാഗരാജൻ മാസ്റ്റർ ജയനെ കണ്ട്, “നിങ്ങൾ ഇല്ലാതെ ഇനി ചിത്രീകരണം മുന്നോട്ടു പോകില്ല, മറ്റന്നാൾ തന്നെ തിരിച്ചെത്തുമല്ലോ” എന്ന് ചോദിച്ചു.
തമാശ രൂപേണ ജയൻ നൽകിയ മറുപടി ഇങ്ങനെയായിരുന്നു: “കോളിളക്കത്തിൻ്റെ ചിത്രീകരണം ഒരു ദിവസം കൊണ്ട് തന്നെ ഞാൻ പൂർത്തിയാക്കും. കിട്ടുന്ന വണ്ടി പിടിച്ച് എത്രയും വേഗം ഞാൻ ഇവിടെ എത്താം.. ഞാൻ എത്തിയില്ലെങ്കിൽ എൻ്റെ മൃതദേഹം എങ്കിലും എത്തും…” ജയൻ തമാശയായി പറഞ്ഞ ഈ വാക്കുകൾ അറം പറ്റിയെന്ന് ത്യാഗരാജൻ മാസ്റ്റർ പിൽക്കാലത്ത് പലപ്പോഴും തുറന്നു പറഞ്ഞിട്ടുണ്ട്.
ജയൻ്റെ മരണം മലയാളികളിൽ വലിയ മുറിവായപ്പോൾ, ആ സംഭവം മറ്റൊരു നടനെ മാനസികമായി തളർത്തി. ഹെലികോപ്റ്ററിൽ ജയനോടൊപ്പം ഉണ്ടായിരുന്ന സഹഅഭിനേതാവ് ബാലൻ കെ. നായർക്കെതിരെ അധികം വൈകാതെ കിംവദന്തികൾ പരന്നു. ജയൻ്റെ മരണം കൊലപാതകമാണെന്നും അതിൽ ബാലൻ കെ. നായർക്ക് പങ്കുണ്ടെന്നും വാർത്തകൾ വന്നു. പത്രമാധ്യമങ്ങൾ പോലും ഈ അഭ്യൂഹങ്ങൾക്ക് വലിയ പ്രാധാന്യം നൽകിയിരുന്നുവെന്ന് ചലച്ചിത്ര പ്രവർത്തകർ പറയുന്നു.
ഈ ആരോപണം ബാലൻ കെ. നായരെ കടുത്ത മാനസിക വിഷമത്തിലാക്കി. ദീർഘകാലം ഈ വേട്ടയാടലിൽ നിന്ന് മുക്തനാകാൻ അദ്ദേഹത്തിന് സാധിച്ചില്ല. ജയൻ്റെ മരണത്തിൽ എക്കാലവും ചേർത്ത് വായിക്കപ്പെട്ട ഈ പേര്, ആ സങ്കടം മരണം വരെ അദ്ദേഹത്തെ വേട്ടയാടിയിരുന്നെന്ന് അടുത്ത വൃത്തങ്ങൾ സാക്ഷ്യപ്പെടുത്തുന്നു.