ചുമട്ടുതൊഴിലാളി യിൽ നിന്നും ഐ എ എസ് ഓഫിസറിലേക്ക് . എറണാകുളം റെയിൽവേ സ്റ്റേഷനിൽ യാത്രക്കാരുടെ ബാഗുകൾ ചുമക്കുന്ന ശ്രീനാഥ്. കെ എന്ന ചെറുപ്പക്കാരന് ഐഎഎസ് കിട്ടിയതായാണ് വാർത്ത. കഴിഞ്ഞ കുറച്ച് ദിവസങ്ങളിലായി സോഷ്യൽ മീഡിയകളിൽ വൈറലാണ് ഈ വാർത്ത.
നാലാംവട്ട പരിശ്രമത്തിൽ തൻ്റെ തോൽവികളെ തോൽപ്പിച്ച് ശ്രീനാഥ് സിവിൽ സർവീസ് എന്ന കടമ്പ കടന്നു എന്ന് ഗൂഗിൾ പോലും ലോകത്തോട് വിളിച്ചു പറഞ്ഞ വിജയഗാഥ.
ദിവസം 400 -500 രൂപ മാത്രം വരുമാനമുള്ള മൂന്നാറുകാരനായ ഈ യുവാവ് കോച്ചിംഗ് സെൻ്ററുകളിൽ പോകാൻ പണമില്ലാതിരുന്നപ്പോൾ റെയിൽവേ സ്റ്റേഷനിലെ സൗജന്യ വൈഫൈ ഉപയോഗിച്ച് പഠിച്ചതിനെ കുറിച്ചുള്ള വിശദമായ വാർ ത്തയാണ് തുടർന്നുള്ളത്. വായനക്കാരെ ത്രസിപ്പിക്കുന്ന ഈ വാർത്തയ്ക്കു പിന്നിലെ യാഥാർഥ്യം എന്താണ്?
ഐ എ എസ് കിട്ടിയതിൻ്റെ പേരിൽ റെയ്ൽവേ മന്ത്രി പീയുഷ് ഗോയൽ അഭിനന്ദിച്ചു എന്നൊക്കെ വാർത്തയിൽ പറയുന്ന ഈ യുവാവ് ഇപ്പോഴും എറണാകുളം സൗത്ത് റെയ്ൽവേ സ്റ്റേഷനിൽ പോർട്ടറായി പതിവ് പോലെ ജോലി തുടരുകയാണ് എന്നതാണ് യാഥാർ ഥ്യം.
ഈ ഐഎഎസ് വാർത്ത ശുദ്ധ നുണക്കഥയാണന്ന് തെളിയുമ്പോഴും ഷെയർ ചെയ്ത, കമൻ്റ് ഇട്ട ആയിരക്കണക്കിനു പേരെ ഇങ്ങനെ തെറ്റിദ്ധരിപ്പിച്ച ഈ വാർത്ത വന്നതെങ്ങിനെ?
പരസ്യത്തിൻ്റെയും വാർത്തയുടേയും അതിർവരമ്പുകൾ മറച്ച് വായനക്കാരെ കൺഫ്യൂഷനിലാക്കുന്ന ആധുനിക പരസ്യതന്ത്രത്തിൻ്റെ ഭാഗമാണിതും.
റെയ്ൽവയർ വൈഫൈയുടെ പരസ്യത്തിനായാണ് റെയ്ൽവേ പോർട്ടറായ ശ്രീനാഥിൻ്റെ സമ്മതത്തോടെ വർഷങ്ങൾക്കു മുൻപ് ഇത്തരമൊരു പരസ്യം ചെയ്തത്. പക്ഷേ, അതിൽ ശ്രീനാഥിന് കേരള പിഎസ് സി പഠിച്ച് ജോലി നേടിയതായാണ് വാർത്ത വന്നത്. എന്നാൽ ഈ വാർത്ത കേരളത്തിലെ മത്സര പരീക്ഷ കോച്ചിംഗ് സെൻ്ററുകളുടെ കൈയ്യിൽ എത്തിയപ്പോൾ ഒരു പടി കൂടി കടന്നു. അവർ ശ്രീനാഥിന് കൽപ്പിച്ച് കൊടുത്തത് പി എസ് സി ഉദ്യോഗമല്ല, ഐ എ എസ് പദവി തന്നെ . വാർഷിക പരീക്ഷകൾ കഴിഞ്ഞ് ഫലം വരുന്ന സമയമായതോടെ കുട്ടികളെ എങ്ങനെയും ക്യാൻവാസ് ചെയ്യാൻ മത്സരിക്കുന്ന കോച്ചിംഗ് സെൻ്ററുകാർ വളഞ്ഞ വഴിയിലൂടെയാണങ്കിലും ഈ വാർത്ത ഒരു തുറുപ്പു ചീട്ടാക്കുകയായിരുന്നു. ഇതൊന്നുമറിയാതെ പരസ്വത്തിൽ വേഷമിട്ട ശ്രീനാഥ് അഭിനന്ദനങ്ങളും കളിയാക്കലുകളും കൊണ്ട് ആകെ പുലിവാൽ പിടിച്ച അവസ്ഥയിലുമായി . ഇതിനെതിരെ നിയമനടപടികൾ സ്വീകരിക്കാനുള്ള തയാറെടുപ്പിലാണ് ശ്രീനാഥ് ഇപ്പോൾ.
വാർത്ത ഇങ്ങനെ:
ചുമട്ടു തൊഴിലാളിയിൽ നിന്നും IAS ഓഫീസറിലേക്ക് ; റെയിൽവേയുടെ ഫ്രീ wifi വെച്ച് പഠിച്ച ശ്രീനാഥ് സിവിൽ സർവീസിൽ!
എറണാകുളം റെയിൽവേ സ്റ്റേഷനിൽ യാത്രക്കാരുടെ ബാഗുകൾ ചുമക്കുമ്പോഴും ശ്രീനാഥ് കെ. എന്ന ചെറുപ്പക്കാരന്റെ കാതുകളിൽ പാട്ടായിരുന്നില്ല, മറിച്ച് ചരിത്രവും ഭൂമിശാസ്ത്രവും ആയിരുന്നു! ദിവസം 400-500 രൂപ മാത്രം വരുമാനമുള്ള, മൂന്നാറുകാരനായ ഒരു സാധാരണ കൂലിപ്പണിക്കാരന് ഐഎഎസ് എന്നത് ഒരുപക്ഷേ ചിന്തിക്കാൻ പോലും പറ്റാത്ത സ്വപ്നമായിരിക്കാം. കോച്ചിംഗ് സെന്ററുകളിൽ പോകാൻ പണമില്ലാതിരുന്നപ്പോൾ, റെയിൽവേ സ്റ്റേഷനിലെ സൗജന്യ വൈഫൈ അദ്ദേഹം തന്റെ ക്ലാസ് മുറിയാക്കി മാറ്റി. നാലാം വട്ടം, തന്റെ തോൽവികളെ തോൽപ്പിച്ച് ശ്രീനാഥ് സിവിൽ സർവീസ് എന്ന ആ വലിയ കടമ്പ കടന്നു. ഗൂഗിൾ പോലും ലോകത്തോട് വിളിച്ചു പറഞ്ഞ വിജയഗാഥ! “പണമല്ല, പ്രതിബദ്ധതയാണ് വേണ്ടത്” എന്ന് തെളിയിച്ച ശ്രീനാഥിന്റെ ജീവിതം നമ്മളോട് പറയുന്നത് ഇതാണ്: സാഹചര്യങ്ങളെ പഴിക്കാതെ, ലക്ഷ്യത്തിനായി പൊരുതുക. വിജയം നിങ്ങളെ തേടിയെത്തും!
എസ്. ആനന്ദ് രാജ്
