Monday, December 1, 2025
Monday, December 1, 2025
Homelifestyleബിഗ് ബോസ് വിന്നർ അനുമോൾക്ക് കിട്ടുക: പ്രതിഫലം 65 ലക്ഷം, ക്യാഷ് പ്രൈസ് 42.55 ലക്ഷം,...

ബിഗ് ബോസ് വിന്നർ അനുമോൾക്ക് കിട്ടുക: പ്രതിഫലം 65 ലക്ഷം, ക്യാഷ് പ്രൈസ് 42.55 ലക്ഷം, വിക്ടോറിയസ് കാർ

Published on

പിആർ വിവാദങ്ങളും ശക്തമായ മത്സരവും നിറഞ്ഞ  ബിഗ് ബോസ് സീസണാണ് ഞായറാഴ്ച സമാപിച്ചത്.  വിജയകിരീടം ചൂടി 100 ദിവസത്തെ ബിഗ് ബോസ് യാത്ര പൂർത്തിയാക്കിയ അനുമോൾക്ക് ലഭിച്ച നേട്ടങ്ങൾ ഏറെയാണ്. 

ഈ സീസണിൽ ഏറ്റവും കൂടുതൽ പ്രതിഫലം കൈപ്പറ്റിയ മത്സരാർത്ഥികളിൽ ഒരാൾ അനുമോളാണ്. പ്രതിദിനം 65,000 രൂപ എന്ന കണക്കിൽ 100 ദിവസം വീട്ടിൽ പൂർത്തിയാക്കിയപ്പോൾ, അനുമോൾക്ക് പ്രതിഫലമായി മാത്രം ലഭിക്കുന്നത്  65 ലക്ഷം രൂപയാണ്.

സമ്മാനത്തുകയേക്കാൾ കൂടുതൽ പ്രതിഫലം വാങ്ങുന്ന മത്സരാർത്ഥിയാണ് അനുമോൾ. 

 വിജയിക്ക് പ്രഖ്യാപിച്ച 50 ലക്ഷം രൂപയിൽ നിന്ന്, ‘ബിഗ് ബാങ്ക് വീക്ക്’ ടാസ്കുകളിലൂടെ മത്സരാർത്ഥികൾ നേടിയ തുക കുറച്ചതിനു ശേഷം ബാക്കിയുള്ള 42.55 ലക്ഷം രൂപയാണ് അനുമോൾക്ക് ക്യാഷ് പ്രൈസായി ലഭിച്ചത്. 

ഈ സമ്മാനത്തുകയ്ക്ക് നിലവിലെ നിയമങ്ങൾ അനുസരിച്ച് ഏകദേശം 30% വരെ നികുതി നൽകേണ്ടിവരും. നികുതി കിഴിച്ചുള്ള തുകയായിരിക്കും അനുമോൾക്ക് കൈമാറുക. 

ശമ്പളത്തിനും ക്യാഷ് പ്രൈസിനും പുറമെ, വിജയിക്ക് ഒരു സർപ്രൈസ് സമ്മാനവും കാത്തിരിക്കുന്നുണ്ടായിരുന്നു – അത് മാരുതി വിക്ടോറിയസ് കാറാണ്. ഈ കാറിന്റെ ഓൺ-റോഡ് പ്രൈസ് ഏകദേശം 12 ലക്ഷം രൂപ മുതൽ 24 ലക്ഷം രൂപ വരെയാണ് (മോഡലും ഫീച്ചറുകളും അനുസരിച്ച് ഇതിന് മാറ്റം വരാം).

പ്രതിഫലം, ക്യാഷ് പ്രൈസ്, ആഢംബര കാർ എന്നിവയെല്ലാം ചേർത്ത്, ബിഗ് ബോസ് മലയാളം സീസൺ 7-ൽ നിന്ന് ഏതാണ്ട് ഒരു കോടി രൂപയോളം മൂല്യമുള്ള സമ്മാനങ്ങളുമായാണ് അനുമോൾ പുറത്തിറങ്ങുന്നത്. 

മത്സരാർത്ഥിയുടെ പ്രശസ്തി, സെലിബ്രിറ്റി പദവി, ഒപ്പിട്ട കരാർ എന്നിവയെ ആശ്രയിച്ചാണ് പ്രതിദിന പ്രതിഫലം നിശ്ചയിക്കുന്നത്. 

ബിഗ് ബോസ്: 35 ലക്ഷം മുതൽ അഞ്ച് ലക്ഷം വരെ പ്രതിഫലം

കോമണർ എന്ന ടാഗോടെ ബിഗ് ബോസ് ഹൗസിൽ എത്തിയ അനീഷ്, പ്രേക്ഷകരുടെ പ്രിയതാരങ്ങളും പരിചിത മുഖങ്ങളുമായിരുന്നവരെ പിന്നിലാക്കിയാണ് രണ്ടാം സ്ഥാനം പിടിച്ചത്. സീസണിന്റെ തുടക്കം മുതൽ അവസാനം വരെ ഹൗസിൽ ശക്തമായ സാന്നിധ്യം അറിയിച്ച് ഗെയിം കളിച്ച ഷാനവാസ് ആണ് മൂന്നാം സ്ഥാനത്ത്. അവസാന ആഴ്ചകളിലെ പ്രകടനങ്ങളുടെ ബലത്തിൽ വോട്ടിങ്ങിൽ വലിയ മുന്നേറ്റം നടത്തിയാണ് നെവിൻ നാലാം സ്ഥാനത്ത് എത്തിയിരിക്കുന്നത്. അക്ബർ ആണ് അഞ്ചാമത്. 

മിനിസ്ക്രീൻ താരമായ ഷാനവാസ് ഷാനു പ്രതിദിനം 35,000 രൂപയാണ് പ്രതിഫലം കൈപ്പറ്റുന്നത്. 100 ദിവസത്തെ അദ്ദേഹത്തിന്റെ മൊത്തം വരുമാനം ഏകദേശം 35 ലക്ഷം രൂപയാണ്.അക്ബർ ഖാനും നെവിനും പ്രതിദിനം ഏകദേശം ₹5,000 രൂപ വീതമാണ് പ്രതിഫലം നേടുന്നത്. ഈ കണക്കനുസരിച്ച് ഇരുവരുടെയും 100 ദിവസത്തെ വരുമാനം ഏകദേശം 5 ലക്ഷം രൂപ വീതമായിരിക്കും.കോമണർ വിഭാഗത്തിൽ എത്തിയ അനീഷിന് സെലിബ്രിറ്റികളെപ്പോലെ വലിയ പ്രതിഫലം ലഭിക്കില്ല. അനീഷിന്റെ പ്രതിദിന ശമ്പളം അടിസ്ഥാന നിരക്കായ 3,500 മുതൽ 5,000 വരെ ആണ്.

അത്ര പോസിറ്റിവിറ്റിയല്ല അനുമോളെ കാത്തിരിക്കുന്നത്

അനുമോളുടെ ബിഗ് ബോസിലെ നൂറ് ദിനങ്ങളിൽ ഭൂരിഭാഗവും വിവാദങ്ങളാൽ നിറഞ്ഞതായിരുന്നു. കരച്ചിൽ ഡ്രാമ എന്ന വിമർശനങ്ങൾ ശക്തമായിരുന്നെങ്കിലും പ്രേക്ഷകരുടെ പിന്തുണ അനുമോൾക്ക് കിട്ടി. ബിഗ് ബോസ് ട്രോഫിയുമായി അനുമോൾ തിരിച്ചെത്തുമ്പോൾ പക്ഷേ പിആർ വിവാദങ്ങൾ താരത്തിന്റെ ആ സന്തോഷത്തിന് കരിനിഴൽ വീഴ്ത്താൻ സാധ്യതയുണ്ട്. പിആറിന്റെ ബലത്തിൽ ആണ് അനുമോൾ ബിഗ് ബോസ് വിജയി ആയിരിക്കുന്നത് എന്ന ആരോപണങ്ങൾ അത്ര പെട്ടെന്ന് കെട്ടടങ്ങിയേക്കില്ല. 

16 ലക്ഷം രൂപയുടെ പിആർ ആണ് അനുമോൾ കൊടുത്തിരിക്കുന്നത് എന്ന് ആരോപിച്ച് സഹ മത്സരാർഥികൾ അനുമോളെ ഹൗസിനുള്ളിൽ നേരിട്ടിരുന്നു. അനുമോളുടെ പിആർ മറ്റ് മത്സരാർഥികളുടെ ജീവിതത്തെ ബാധിക്കുന്ന വിധത്തിൽ പ്രവർത്തിക്കുന്നു എന്ന് പറഞ്ഞ് ശൈത്യ ഉൾപ്പെടെയുള്ളവർ അനുമോൾക്കെതിരെ രൂക്ഷമായി പ്രതികരിച്ചു. എവിക്ട് ആയ മത്സരാർഥികളുടെ റിഎൻട്രിയിൽ കടുത്ത ആക്രമണം നേരിട്ടിട്ടും അനുമോൾക്ക് ലഭിക്കുന്ന വോട്ടിനെ അത് ബാധിച്ചില്ല. ആര്യനും ജിസേലും തമ്മിലുള്ള വിഷയം അനുമോൾ ഉയർത്തിയത് ഹൗസിനുള്ളിലും പുറത്തും വലിയ അലയൊലിയാണ് സൃഷ്ടിച്ചത്. വീക്കെൻഡ് എപ്പിസോഡിൽ മോഹൻലാലിൽ നിന്ന് അനുമോൾക്ക് രൂക്ഷമായ വിമർശനം നേരിട്ടു. എന്നാൽ താൻ പറഞ്ഞ കാര്യത്തിൽ അനുമോൾ ഉറച്ച് തന്നെ നിന്നു. ജിസേലുമായി അനുമോൾ ഏറെ കൊമ്പുകോർത്തിരുന്നു സീസണിന്റെ ആദ്യ ആഴ്ചകളിൽ. 

ബിഗ് ബോസ് മലയാളം സീസൺ 7 ഓർക്കാൻ പോകുന്നത് പ്ലാച്ചിയുടെ പേരിലും പട്ടായ ഗേൾസിന്റെ പേരിലും കൂടിയാണ്. ആദില, നൂറ എന്നിവർക്കൊപ്പമുള്ള അനുമോളുടെ സൗഹൃദം പ്രേക്ഷകർക്ക് കൗതുകമായിരുന്നു. എന്നാൽ പലപ്പോഴും രണ്ട് കൂട്ടരും തമ്മിൽ വലിയ പ്രശ്നങ്ങൾ ഉണ്ടായി. എവിക്ട് ആവുന്നതിന് മുൻപ് വരെ അനുമോൾക്കെതിരെയാണ് ആദില കളിച്ചത്. ഇതിനെല്ലാം കരഞ്ഞും ഒറ്റപ്പെട്ടിരുന്നുമായിരുന്നു അനുമോളുടെ മറുപടി. 

ബിഗ് ബോസ് സീസൺ 5 വിജയിയായ അഖിൽ മാരാർ, സ്റ്റാർ മാജിക് മത്സരാർത്ഥികൾ, സീരിയൽ താരങ്ങൾ തുടങ്ങി നിരവധി പ്രമുഖർ അനുമോൾക്ക് പരസ്യ പിന്തുണയുമായി രംഗത്തുവന്നിരുന്നു.

മാരാരെ കൊട്ടി അനീഷിനെ തലോടി തൊപ്പി

വോട്ടിംഗ് അവസാനിക്കുന്നതിന് തൊട്ടുമുമ്പ് ബിഗ് ബോസ് സീസൺ 5 വിജയിയായ അഖിൽ മാരാരും സോഷ്യൽ മീഡിയ താരമായ തൊപ്പിയും തമ്മിൽ അപ്രതീക്ഷിതമായൊരു പരസ്യ ഏറ്റുമുട്ടലുണ്ടായി. അനുമോളുടെ പിആർ  ടീമിനും മാരാർക്കുമെതിരെയുള്ള തൊപ്പിയുടെ ‘സർജിക്കൽ സ്ട്രൈക്ക്’ ആയിരുന്നു ഇത്.കഴിഞ്ഞ വർഷം ജിന്റോയുടെ പിആർ ടീമിൽ നിന്ന് പണം വാങ്ങി തൊപ്പി ജിന്റോയ്ക്ക് വേണ്ടി വോട്ട് ക്യാൻവാസ് ചെയ്തു എന്ന മാരാരുടെ ആരോപണമാണ് പോരിന് കാരണമായത്.

തന്റെ ലൈവ് സ്ട്രീമിനിടെ മാരാരെ ഫോണിൽ വിളിച്ച് തൊപ്പി ഈ ആരോപണത്തിന് തെളിവ് ആവശ്യപ്പെട്ടു. അനുമോളുടെ പിആർ ചെയ്യുന്ന വിനു വിജയ് ആണ് ഈ വിവരം തന്നോട് പറഞ്ഞതെന്ന് മാരാർ പറയുന്നു.

എങ്കിൽ വിനുവിനെ  കൂടി ലൈവ് കോളിൽ ഉൾപ്പെടുത്തി കാര്യങ്ങൾ വ്യക്തമാക്കാമെന്ന് തൊപ്പി ആവശ്യപ്പെട്ടപ്പോൾ മാരാർ അതിൽ നിന്ന് ഒഴിഞ്ഞുമാറുകയായിരുന്നു. ഈ സംഭാഷണം രൂക്ഷമായ വാഗ്വാദത്തിലേക്ക് വഴിമാറുന്നതും ലൈവിൽ കാണാമായിരുന്നു.

തനിക്കെതിരെ വ്യാജ ആരോപണം ഉന്നയിച്ച മാരാരോടും അനുമോളുടെ പിആർ  ടീമിനോടുമുള്ള ദേഷ്യത്തിൽ, വോട്ടിംഗിൽ തൊട്ടു പിന്നിലുള്ള അനീഷിന് പരസ്യ പിന്തുണ പ്രഖ്യാപിക്കുകയായിരുന്നു തൊപ്പി. തന്റെ ലൈവ് സ്ട്രീമിംഗ് പ്ലാറ്റ്‌ഫോമിലൂടെ അനീഷിന് വോട്ട് ചെയ്യാൻ തൊപ്പി തന്റെ ലക്ഷക്കണക്കിന് ഫോളോവേഴ്സിനോട് ആഹ്വാനം ചെയ്തു.

കോമണർ പട്ടം മാറ്റി റണ്ണറപ്പ് കിരീടം നേടി അനീഷ്

സാധാരണ സർക്കാർ ഉദ്യോഗസ്ഥനിൽ നിന്ന്, ആദ്യമായി ബിഗ് ബോസ് ഫിനാലെയിൽ എത്തുകയും ഫസ്റ്റ് റണ്ണറപ്പ് ആകുകയും ചെയ്യുന്ന ‘കോമണർ’ എന്ന റെക്കോർഡ് അനീഷ് സ്വന്തമാക്കി. തന്റെ സ്വപ്നത്തിനുവേണ്ടി ജോലി ഉപേക്ഷിച്ചെത്തിയ അനീഷ്, പ്രേക്ഷകരുടെ മനസ്സിൽ പതിഞ്ഞാണ് മടങ്ങിയത്. അനീഷ് ബിഗ് ബോസ് വീട്ടിലെത്തിയത് ഒരു സെലിബ്രിറ്റി പരിവേഷവുമില്ലാതെയാണ്. എഴുത്തിലും സംസാരത്തിലുമുള്ള അദ്ദേഹത്തിന്റെ കഴിവുകൾ പുറത്തുണ്ടായിരുന്നെങ്കിലും, വീട്ടിലെത്തി ആദ്യനാളുകളിൽ അദ്ദേഹം ലാളിത്യം കൊണ്ടും വിനയം കൊണ്ടും ശ്രദ്ധ നേടി. അനീഷിന്റെ ശാന്തമായ പെരുമാറ്റം, കാര്യങ്ങളെപ്പറ്റിയുള്ള ആഴത്തിലുള്ള കാഴ്ചപ്പാടുകൾ, ചിന്തിച്ച് സംസാരിക്കുന്ന രീതി എന്നിവ തുടക്കത്തിൽ തന്നെ അനീഷിന് ഒരു വിഭാഗം പ്രേക്ഷകരുടെ പിന്തുണ നേടിക്കൊടുത്തു. ഈ സീസണിലെ ആദ്യത്തെ ക്യാപ്റ്റനും അനീഷ് ആയിരുന്നു.

വീടിനകത്തെ മത്സരങ്ങൾ കടുപ്പമേറിയതോടെ അനീഷിന്റെ സ്വഭാവത്തിലെ ചില പ്രത്യേകതകൾ ചർച്ചയായി. ചില കാര്യങ്ങളിൽ ഉറച്ച നിലപാടെടുക്കുകയും അത് ആവർത്തിച്ച് പറയുകയും ചെയ്യുന്ന അനീഷിന്റെ  രീതി ചിലർക്ക് വാശിയായി തോന്നിയെങ്കിലും, മറ്റ് ചിലർ അനീഷിന്റെ ആത്മാർത്ഥതയായി ഇതിനെ കണ്ടു. വൈകാരികമായ പ്രതികരണങ്ങളും തർക്കങ്ങളും അനീഷിന്റെ യാത്രയിൽ ധാരാളമുണ്ടായി.അനീഷിന്റെ ഒരു സംഭാഷണ ശകലം വീട്ടിലും പുറത്തും വൻ തരംഗമായി മാറി.  സഹമത്സരാർത്ഥിയായിരുന്ന രേണു സുധിയോടുള്ള സംസാരത്തിനിടെ അനീഷ് പറഞ്ഞ “കണ്ണടച്ചു കിടക്കുന്നത് ഞാൻ കണ്ടു!” എന്ന ഡയലോഗ് സോഷ്യൽ മീഡിയയിൽ മീമുകളും റീമിക്സുകളുമായി നിറഞ്ഞു. ഈ ഒറ്റവരി, അനീഷിനെ പ്രേക്ഷകർക്കിടയിൽ കൂടുതൽ പരിചിതനാക്കി.

സഹമത്സരാർത്ഥിയായിരുന്ന അനുമോളുമായുള്ള അനീഷിന്റെ സൗഹൃദം ഹൗസിനുള്ളിലെ പ്രധാന ചർച്ചാവിഷയമായി. ഒരു ഘട്ടത്തിൽ അനുമോളോട് അദ്ദേഹം വിവാഹാഭ്യർത്ഥന നടത്തുകയും അത് വലിയ ശ്രദ്ധ നേടുകയും ചെയ്തു. അനുമോൾ ഈ പ്രൊപ്പോസലിനെ തമാശയായി കണ്ട് തള്ളിക്കളഞ്ഞെങ്കിലും, ഇത് അനീഷിന്റെ വൈകാരികമായ സത്യസന്ധതയായി പലരും വിലയിരുത്തി. വീടിനുള്ളിൽ അനീഷ് ഒരു ഗ്രൂപ്പിന്റെ ഭാഗമായി കളിക്കുന്നതിനേക്കാൾ കൂടുതലും ഒറ്റപ്പെട്ട് കളിക്കുന്നു എന്ന് വിമർശനം ഉയർന്നിരുന്നു. പലപ്പോഴും തനിച്ചുള്ള യാത്രയും സ്വയം പഴിക്കുന്ന രീതിയും കാരണം, ‘ഒറ്റപ്പെടൽ’  സ്ട്രാറ്റജി കളിക്കുന്നു എന്ന് മറ്റ് മത്സരാർത്ഥികൾ കളിയാക്കി. എന്നാൽ, അനീഷിന്റെ ആരാധകർ  ഈ നിലപാടിനെ ആത്മാർത്ഥതയുടെയും തന്റേടത്തിന്റെയും ലക്ഷണമായി കണ്ടു.

വീടിനുള്ളിൽ അഭിപ്രായ വ്യത്യാസങ്ങൾ ഉണ്ടാകുമ്പോൾ അനീഷ് ശക്തമായി പ്രതികരിച്ചു. ചില സമയങ്ങളിൽ വികാരങ്ങൾ നിയന്ത്രിക്കാൻ കഴിയാതെ വന്നത് അനീഷിന് തിരിച്ചടിയായി. എങ്കിലും, ഭൂരിഭാഗം സമയത്തും തന്റെ വാദങ്ങളിൽ യുക്തി കണ്ടെത്തി.

ഫൈനൽ റൗണ്ടിൽ എത്തിയതോടെ അനീഷിന്റെ ജനപിന്തുണ വർധിച്ചു. ‘സാധാരണക്കാരൻ’ എന്ന പ്രതിച്ഛായയും, തന്റെ സ്വപ്നത്തിനായി ജോലി ഉപേക്ഷിച്ച കഥയും, വീടിനുള്ളിലെ നിഷ്കളങ്കമായ ഇടപെടലുകളും അനീഷിന് 

 വലിയ വോട്ടിങ് ബലം നൽകി. ബിഗ് ബോസ് മലയാളത്തിന്റെ ചരിത്രത്തിൽ ആദ്യമായി ഒരു സാധാരണക്കാരൻ ടൈറ്റിൽ വിന്നറാകുമോ എന്ന ആകാംഷ പ്രേക്ഷകർക്കിടയിൽ ഉയർത്തിയത് അനീഷാണ്.

പി ആറും ജാതിക്കളികളും

വ്യക്തിഗത പ്രകടനത്തിന്റെ അടിസ്ഥാനത്തിൽ വിജയിയെ കണ്ടെത്തേണ്ട ബിഗ് ബോസ്  റിയാലിറ്റി ഷോ, വൃത്തികെട്ട പിആർ സ്ട്രാറ്റജികളുടെ വേദിയായി മാറി എന്ന വിമർശനം ശക്തമായി ഉയർന്നിരുന്നു.

ഒരു ഫൈനലിസ്റ്റിന് വേണ്ടി ലക്ഷങ്ങൾ മുടക്കി ബൾക്ക് വോട്ടിംഗ് ഉറപ്പാക്കുകയും, പ്രമുഖരെ ഉപയോഗിച്ച് പരസ്യമായി വോട്ട് ക്യാൻവാസിങ് നടത്തുകയും ചെയ്യുന്നത് ഈ സീസണിൽ വ്യക്തമായി കണ്ട കാഴ്ചയാണ്.  ബിഗ് ബോസ് സീസൺ 5 വിജയി അഖിൽ മാരാർ, മറ്റ് സെലിബ്രിറ്റികൾ എന്നിവരുടെ പിന്തുണ അനുമോളുടെ വോട്ട് ബാങ്കിനെ കാര്യമായി സ്വാധീനിച്ചു എന്ന റിപ്പോർട്ടുകൾ നിലനിൽക്കുന്നു. പണത്തിന്റെ ശക്തി ഉപയോഗിച്ച് ഒരു വിനോദ മത്സരത്തിന്റെ ഫലം അട്ടിമറിക്കാനുള്ള ശ്രമമാണ് നടന്നത് എന്ന ശക്തമായ ആരോപണം പ്രേക്ഷകർക്കിടയിൽ നിലനിൽക്കുന്നുണ്ട്. 

അന്തിമഘട്ടത്തിൽ പോലും ജാതിയും സാമുദായിക വികാരങ്ങളും വോട്ട് നേടാനുള്ള തന്ത്രമായി ഉപയോഗിച്ചെന്ന ആരോപണം അതീവ ഗൗരവതരമാണ്.

‘ഈഴവ സേന’ പോലുള്ള സോഷ്യൽ മീഡിയ പേജുകളിൽ ഫൈനലിസ്റ്റ് മത്സരാർത്ഥിയായ അനുമോൾക്ക് വേണ്ടി സാമുദായിക വോട്ടുകൾ അഭ്യർത്ഥിച്ചതായുള്ള റിപ്പോർട്ടുകൾ പുറത്തുവന്നിരിക്കുകയാണ്. ജാതിയുടെയും മതത്തിന്റെയും പേരിൽ വോട്ട് പിടിക്കുന്ന രാഷ്ട്രീയ പോരാട്ടങ്ങൾക്കു സമമായാണ് ഇത്തവണ വോട്ടിംഗ് വേട്ട മുന്നേറിയത് എന്നത് ലജ്ജാകരമാണ്. 

മത്സരാർത്ഥിയുടെ കഴിവോ ജനപ്രീതിയോ അല്ല, മറിച്ച് പിആർ ഏജൻസികളുടെ സാമുദായിക കണക്കെടുപ്പുകളും സാമ്പത്തിക ശേഷിയുമാണ് വിജയിയെ തീരുമാനിക്കുന്നതെങ്കിൽ, ബിഗ് ബോസ് പോലുള്ള പരിപാടികളുടെ വിശ്വാസ്യത പൂർണ്ണമായും തകരും. പണം മുടക്കി കപ്പ് നേടാൻ ശ്രമിക്കുന്ന ഈ മോശം പ്രവണത, അർഹരായ മത്സരാർത്ഥികളുടെ സാധ്യതകൾ ഇല്ലാതാക്കുക മാത്രമല്ല, പ്രേക്ഷകരുടെ വോട്ടവകാശത്തെയും വികാരങ്ങളെയും വഞ്ചിക്കുകയാണ് ചെയ്യുന്നത്. 

ഇത്തരം അനാരോഗ്യകരമായ പിആർ കളികൾ ഒരു വിനോദ പരിപാടിയുടെ തലം താഴ്ത്തി, അതിനെ വൃത്തികെട്ട രാഷ്ട്രീയത്തിന്റെ കളിക്കളത്തിലേക്ക് വഴിതിരിച്ചുവിടുന്നു എന്ന വിമർശനത്തിൽ ഒട്ടും അതിശയോക്തിയില്ല.

Latest articles

റെയ്ൽവേ പോർട്ടറിന് ഐ എ എസ്: കൺഫ്യൂഷനിലായി വായനക്കാർ; പുലിവാൽ പിടിച്ച് പോർട്ടർ

ചുമട്ടുതൊഴിലാളി യിൽ നിന്നും ഐ എ എസ് ഓഫിസറിലേക്ക് . എറണാകുളം റെയിൽവേ സ്റ്റേഷനിൽ യാത്രക്കാരുടെ ബാഗുകൾ ചുമക്കുന്ന...

പ്രകടന മികവുമായി ദുൽഖർ സൽമാൻ; ‘കാന്ത’ ക്ക് ആരാധകരേറെ

ദുൽഖർ സൽമാൻ നായകനായെത്തിയ ‘കാന്ത’ വമ്പൻ പ്രേക്ഷക- നിരൂപക പ്രശംസ നേടി പ്രദർശനം തുടരുന്നു. ഒരു നടനെന്ന നിലയിൽ...

‘കരിമി’ഫാന്റസി ചിത്രവുമായി സുനിൽ പുള്ളോട്

ഹാഫ് ലൈറ്റ് പ്രൊഡക്ഷൻസ്ന്റെ ബാനറിൽ നന്ദൂ പാലക്കാട്‌ നിർമ്മിച്ച് സുനിൽ പുള്ളോട് തിരക്കഥയും സംവിധാനവും നിർവ്വഹിക്കുന്ന ഫാന്റസി ചിത്രമാണ്...

ഹാൽ വിവാദം; അഭിഭാഷകന്റെ പിഴവ്, പുനഃപരിശോധന ഹര്‍ജി നൽകും; സംവിധായകൻ

ഹാൽ സിനിമയുമായി ബന്ധപ്പെട്ട് ആവിഷ്കാര സ്വാതന്ത്ര്യത്തെ സംരക്ഷിച്ചുകൊണ്ടാണ് കോടതി ഉത്തരവ് പുറപ്പെടുവിച്ചതെന്ന് വ്യക്തമാക്കി സംവിധായകൻ റഫീഖ് വീര. ബീഫ്...

More like this

റെയ്ൽവേ പോർട്ടറിന് ഐ എ എസ്: കൺഫ്യൂഷനിലായി വായനക്കാർ; പുലിവാൽ പിടിച്ച് പോർട്ടർ

ചുമട്ടുതൊഴിലാളി യിൽ നിന്നും ഐ എ എസ് ഓഫിസറിലേക്ക് . എറണാകുളം റെയിൽവേ സ്റ്റേഷനിൽ യാത്രക്കാരുടെ ബാഗുകൾ ചുമക്കുന്ന...

പ്രകടന മികവുമായി ദുൽഖർ സൽമാൻ; ‘കാന്ത’ ക്ക് ആരാധകരേറെ

ദുൽഖർ സൽമാൻ നായകനായെത്തിയ ‘കാന്ത’ വമ്പൻ പ്രേക്ഷക- നിരൂപക പ്രശംസ നേടി പ്രദർശനം തുടരുന്നു. ഒരു നടനെന്ന നിലയിൽ...

‘കരിമി’ഫാന്റസി ചിത്രവുമായി സുനിൽ പുള്ളോട്

ഹാഫ് ലൈറ്റ് പ്രൊഡക്ഷൻസ്ന്റെ ബാനറിൽ നന്ദൂ പാലക്കാട്‌ നിർമ്മിച്ച് സുനിൽ പുള്ളോട് തിരക്കഥയും സംവിധാനവും നിർവ്വഹിക്കുന്ന ഫാന്റസി ചിത്രമാണ്...