കോഴിക്കോട്: നിയമസഭാ തിരഞ്ഞെടുപ്പിൽ കോഴിക്കോട് ജില്ലയിലെ രണ്ട് പ്രധാന മണ്ഡലങ്ങളെ കേന്ദ്രീകരിച്ച് ബി.ജെ.പി – കോൺഗ്രസ്സ് അവിശുദ്ധ കൂട്ടുകെട്ട് നിലനിൽക്കുന്നതായി രാഷ്ട്രീയ ആരോപണം. കോഴിക്കോട് സൗത്ത് മണ്ഡലത്തിൽ ബി.ജെ.പിക്ക് അനുകൂലമായ സാഹചര്യം ഒരുക്കുന്നതിന് പകരമായി, പേരാമ്പ്രയിൽ ലീഗ് സ്ഥാനാർത്ഥി അഡ്വ. തഹ്ലിയെ വിജയിപ്പിക്കാൻ ബി.ജെ.പി സഹായിക്കുമെന്നാണ് പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്.
സൗത്തിൽ ദുർബല സ്ഥാനാർത്ഥി; ലക്ഷ്യം ബി.ജെ.പിക്ക് വഴിയൊരുക്കൽ?
കോഴിക്കോട് സൗത്ത് മണ്ഡലത്തിൽ ലീഗിന്റെ കരുത്തരായ ഉന്നത നേതാക്കൾ മത്സരിക്കുമെന്നായിരുന്നു ആദ്യം പുറത്തുവന്ന സൂചനകൾ. എന്നാൽ അപ്രതീക്ഷിതമായി, പൊതുരംഗത്ത് അധികം സജീവമല്ലാത്ത, ജില്ലയ്ക്ക് പുറത്തുള്ള ഒരു പുതുമുഖത്തെയാണ് ലീഗ് ഇവിടെ കളത്തിലിറക്കിയിരിക്കുന്നത്. മണ്ഡലത്തിലെ വോട്ടർമാർക്കിടയിൽ പരിചിതനല്ലാത്ത ഒരാളെ സ്ഥാനാർത്ഥിയാക്കിയത് മനഃപൂർവ്വമാണെന്നും, ഇത് ബി.ജെ.പി വോട്ടുകൾ സമാഹരിക്കുന്നതിന് സഹായിക്കാനാണെന്നും ആക്ഷേപമുയർന്നു കഴിഞ്ഞു.
പേരാമ്പ്രയിലെ ‘സഹായം’
സൗത്തിലെ വിട്ടുവീഴ്ചയ്ക്ക് പകരമായി പേരാമ്പ്ര മണ്ഡലത്തിൽ ലീഗ് സ്ഥാനാർത്ഥി തഹ്ലിയെ സഹായിക്കാനാണ് ധാരണയെന്നാണ് വിവരം. പേരാമ്പ്രയിൽ ബി.ജെ.പി വോട്ടുകൾ കൃത്യമായി മറിച്ച് നൽകുന്നതിലൂടെ യു.ഡി.എഫ് സ്ഥാനാർത്ഥിയുടെ വിജയം സുരക്ഷിതമാക്കുകയാണ് ഈ ‘ഡീലിന്റെ’ ലക്ഷ്യം. ജില്ലയ്ക്ക് പുറത്തുള്ള നേതാവായ തഹ്ലിയെ പേരാമ്പ്രയിൽ പ്രതിഷ്ഠിച്ചതിന് പിന്നിൽ ഇത്തരം മുൻകൂട്ടി തയ്യാറാക്കിയ തിരക്കഥകളുണ്ടെന്നാണ് രാഷ്ട്രീയ നിരീക്ഷകർ വിലയിരുത്തുന്നത്.
