തടിയന്റമോൾ കർണാടകത്തിലെ കുടക് ജില്ലയിലെ ഏറ്റവും ഉയരമുള്ള കൊടുമുടിയായി അറിയപ്പെടുന്നു. സമുദ്രനിരപ്പിൽ നിന്ന് 5,735 അടി ഉയരമുള്ള ഈ മല ട്രെക്കിംഗ് പ്രേമികൾക്ക് വിസ്മയകരമായ അനുഭവമാണ് സമ്മാനിക്കുന്നത്.
മുകളിലേക്ക് കയറുന്ന തോറും മൂടൽമഞ്ഞും മേഘക്കൂട്ടങ്ങളും കാഴ്ച മറയ്ക്കുന്ന പ്രത്യേക അനുഭവമാണ് ഇവിടെ ലഭിക്കുന്നത്. അപകടങ്ങൾ ഒഴിവാക്കാൻ വനവകുപ്പ് മരങ്ങളിൽ കെട്ടിയിരിക്കുന്ന ഓറഞ്ച് റിബണുകൾ പാത തിരിച്ചറിയാൻ സഹായിക്കുന്നു.
ഏകദേശം 12 കിലോമീറ്റർ ദൂരം വരുന്ന ട്രെക്കിംഗ് പാത കയറാൻ കുറഞ്ഞത് നാലര മണിക്കൂർ എടുക്കും. തിരിച്ചിറങ്ങാൻ ഏകദേശം മൂന്ന് മണിക്കൂർ വേണം. പശ്ചിമഘട്ട പാതയിലൂടെ ഇടതൂർന്ന ചോലവനങ്ങളും പുൽമേടുകളും അരുവികളും കടന്നുപോകുന്ന യാത്ര പ്രകൃതി സ്നേഹികൾക്ക് ഏറെ ആകർഷകമാണ്.
ട്രെക്കിംഗ് ആരംഭിക്കുന്നത് കക്കാബെ പാലത്തിൽ നിന്നാണ്. കാപ്പി, കുരുമുളക് തോട്ടങ്ങൾക്കിടയിലൂടെ ആരംഭിക്കുന്ന യാത്രയിൽ കറ്റാർവാഴ, ജാതിക്ക, ഫിഷ്ടെയിൽ ഈന്തപ്പനകൾ തുടങ്ങി വൈവിധ്യമാർന്ന സസ്യജാലങ്ങൾ കാണാം.
കുന്നിൻ ചുവട്ടിൽ സ്ഥിതി ചെയ്യുന്ന നൽക്നാട് കൊട്ടാരം എന്ന പുരാതന കൊട്ടാരവും പ്രധാന ആകർഷണമാണ്. ബ്രഹ്മഗിരി വന്യജീവി സങ്കേതം ഉൾപ്പെടുന്ന ഭാഗത്താണ് ഈ കൊടുമുടി സ്ഥിതി ചെയ്യുന്നത്.
ട്രെക്കിംഗ് രാവിലെ 6 മുതൽ വൈകുന്നേരം 6 വരെയാണ് അനുവദിക്കുന്നത്. ഉച്ചയ്ക്ക് 2.30ന് ശേഷം ഫോറസ്റ്റ് ചെക്ക്പോസ്റ്റ് കടന്ന് ട്രെക്കിംഗ് നടത്താൻ അനുമതിയില്ല. സുരക്ഷയ്ക്കായി സന്ധ്യയ്ക്ക് മുമ്പ് തന്നെ തിരിച്ചെത്തണമെന്ന് അധികൃതർ നിർദേശിക്കുന്നു.
സെപ്തംബർ മുതൽ ഫെബ്രുവരി വരെയാണ് ട്രെക്കിംഗിന് അനുയോജ്യമായ സീസൺ. കാട്ടുതീ ഭീഷണി നിലനിൽക്കുന്നതിനാൽ ഏപ്രിൽ മുതൽ ജൂൺ വരെ ട്രെക്കിംഗ് നിയന്ത്രണവിധേയമാണ്.
