ബിഗ് ബോസ് മലയാളം ഏഴാം സീസൺ കഴിഞ്ഞ് അനുമോൾ കപ്പുയർത്തി നിൽക്കുമ്പോൾ പ്രതിഫലമാണ് ചർച്ച. അനുമോൾ ദിവസം 65000 വീതം 100 ദിവസം കൊണ്ട് 65 ലക്ഷമാണ് നേടിയത്. എന്നാൽ ബിഗ് ബോസ് ഇതുവരെയുള്ള സീസണുകളിൽ ഏറ്റവും ഉയർന്ന പ്രതിഫലം വാങ്ങിയ മത്സരാർത്ഥി നടി ശ്വേത മേനോൻ ആണ്. ബിഗ് ബോസ് മലയാളത്തിന്റെ ആദ്യ സീസണിലെ മത്സരാർത്ഥിയായിരുന്നു ശ്വേത. ഒരു ദിവസം ഒരു ലക്ഷം രൂപയായിരുന്നു ശ്വേത പ്രതിഫലമായി വാങ്ങിയത്.
ടിവി അവതാരകയായ രഞ്ജിനി ഹരിദാസാണ് രണ്ടാം സ്ഥാനത്തുള്ളത്. സീസൺ ഒന്നിൽ മത്സരാർത്ഥിയായി എത്തിയ രഞ്ജിനിക്ക് ഒരു ദിവസത്തേക്ക് 80,000 രൂപയായിരുന്നു പ്രതിഫലം.ബഡായി ബംഗ്ലാവിലൂടെ മലയാളികൾക്ക് സുപരിചിതയായി മാറിയ നടിയും അവതാരകയുമായ ആര്യയ്ക്ക് പ്രതിദിനം 40,000 മുതൽ 50,000 രൂപ വരെയായിരുന്നു പ്രതിഫലം. നടിയും അവതാരകയുമായ പേളി മാണിയും ആദ്യ സീസണിൽ മത്സരാർത്ഥിയായി എത്തിയിരുന്നു. 50000 രൂപയായിരുന്നു ഒരു ദിവസം പേളിയുടെ പ്രതിഫലം.മൂന്നാം സീസണിലെ മത്സരാർത്ഥിയായ നടൻ മണിക്കുട്ടന് പ്രതിദിനം ഏകദേശം 45,000 രൂപ പ്രതിഫലമായി ലഭിച്ചിരുന്നു എന്നാണ് റിപ്പോർട്ട്. നാലാം സീസണിൽ നടി സുചിത്ര നായരും ഒരു ദിവസം 50000 രൂപ പ്രതിഫലമായി കൈപ്പറ്റിയിരുന്നു.
