തദ്ദേശ തിരഞ്ഞെടുപ്പ് കഴിഞ്ഞ ഉടൻ നിയമസഭാ തിരഞ്ഞെടുപ്പ് വേളയിലേക്ക് കടക്കേണ്ട സാഹചര്യം നിലനിൽക്കുന്നതിനാൽ രാഷ്ട്രീയ താപനിലയും ഉയർന്നിരിക്കുകയാണ്.ഡിസംബർ പകുതിയോടെ തദ്ദേശതിരഞ്ഞെടുപ്പ് അവസാനിച്ചാലും മൂന്നു മാസത്തിനകം നിയമസഭാ തിരഞ്ഞെടുപ്പ് ഒരുക്കങ്ങൾ ആരംഭിക്കേണ്ടതിനാൽ പ്രമുഖ നേതാക്കളെ തന്നെ പ്രചാരണരംഗത്ത് ഇറക്കിയാണ് മുന്നണികൾ മത്സരം നേരിടുന്നത്. പ്രാദേശിക വിഷയങ്ങൾക്കപ്പുറം സംസ്ഥാനതല വിഷയങ്ങൾ ഉയർത്തിക്കാട്ടാനാണ് എല്ലാ മുന്നണികളും തയ്യാറെടുക്കുന്നത്.

യുഡിഎഫ്: സ്വർണക്കവർച്ചയും ആരോഗ്യരംഗ പ്രതിസന്ധിയും പ്രധാന ആയുധം

ഭരണവിരുദ്ധ വികാരം മുതലെടുത്ത് നേട്ടം കൊയ്യാനാണ് യുഡിഎഫ് നീക്കം ചെയ്യുന്നത്.ആരോഗ്യമേഖലയിലെ തുടർച്ചയായ വീഴ്‌ചകളും ശബരിമല സ്വർണക്കവർച്ചയും ആശാ അങ്കണവാടി പ്രവർത്തകരോടുള്ള അവഗണനയും യുഡിഎഫ് പ്രചാരണത്തിന്റെ മുഖ്യ വിഷയങ്ങളാകും.സ്‌ഥാനാർഥികളെ മുൻകൂട്ടി പ്രഖ്യാപിച്ചതിലൂടെ യുഡിഎഫ് പ്രചാരണരംഗത്ത് മുൻതൂക്കം നേടിയിട്ടുണ്ട്. ആരോഗ്യരംഗത്തിലെ പ്രതിസന്ധികൾ നേരിട്ട് ജനങ്ങളെ ബാധിക്കുന്നതിനാൽ ശക്തമായ രാഷ്ട്രീയ ആയുധമാക്കി യുഡിഎഫ് ഉപയോഗിക്കും.ദേവസ്വം ബോർഡിനെയും സർക്കാരിനെയും പ്രതിക്കൂട്ടിലാക്കിക്കൊണ്ട് ശബരിമല സ്വർണക്കവർച്ച വിഷയത്തെ വിശ്വാസി സമൂഹത്തിനിടയിൽ സജീവമായി നിലനിർത്താനാണ് മുന്നണി ശ്രമിക്കുന്നത്.

എൽഡിഎഫ്: ക്ഷേമപദ്ധതികളും വികസന നേട്ടങ്ങളും മുന്നോട്ട്

അഞ്ചുവർഷത്തെ ഭരണപ്രവർത്തനങ്ങൾ, ക്ഷേമപദ്ധതികൾ, വികസനനേട്ടങ്ങൾ എന്നിവ ഉയർത്തിക്കാട്ടിയാണ് എൽഡിഎഫ് തദ്ദേശതിരഞ്ഞെടുപ്പിനെ നേരിടുന്നത്.വിഴിഞ്ഞം ഉൾപ്പെടെയുള്ള പ്രധാന പദ്ധതികൾ, മാലിന്യനിർമാർജന പ്രവർത്തനങ്ങൾ, വിദ്യാഭ്യാസ പരിഷ്‌കരണങ്ങൾ എന്നിവയും പ്രചാരണ വിഷയം ആക്കും.2020-ലെ തദ്ദേശതിരഞ്ഞെടുപ്പിൽ ലഭിച്ച വലിയ വിജയത്തിന്റെ ആത്മവിശ്വാസത്തിലാണ് എൽഡിഎഫ്. കേരളാ കോൺഗ്രസ് (എം) മുന്നണിയിൽ തുടരുന്നതോടെ മധ്യകേരളത്തിലെ കരുത്ത് നിലനിർത്താനായതും എൽഡിഎഫിന്റെ വിലയിരുത്തലിൽ വലിയ ഘടകമാണ്.എന്നാൽ ഭരണത്തിന്റെ നേട്ടങ്ങൾ ജനങ്ങളിലേക്കെത്രമാത്രം ഫലപ്രദമായി എത്തിച്ചേരുമെന്നതാണ് ഇടതുമുന്നണിയുടെ പ്രധാന വെല്ലുവിളി.

ബിജെപി: ‘വികസിത കേരളം’ മുദ്രാവാക്യവുമായി ബദൽ രാഷ്ട്രീയം

ഇരുമുന്നണികളുടെ കുത്തക തകർക്കാനാണ് ബിജെപിയുടെ ശ്രമം.‘വികസിത കേരളം’ എന്ന മുദ്രാവാക്യവുമായി മുന്നോട്ട് പോകുന്ന ബിജെപി, വർഷങ്ങളായി മാറിമാറി ഭരിച്ചിട്ടും സംസ്ഥാനത്തിന് യാതൊരു പ്രധാന നേട്ടവും ഉണ്ടായിട്ടില്ലെന്ന വാദം ഉയർത്തും.ഇടത്തരം, മധ്യവർഗ്ഗ വിഭാഗങ്ങളെ ലക്ഷ്യമാക്കി പ്രചാരണം വ്യാപിപ്പിച്ചിരിക്കുകയാണ് ബിജെപി.കേന്ദ്രസർക്കാർ പദ്ധതികളുടെ നേട്ടം സംസ്ഥാന സർക്കാർ ഏറ്റെടുക്കുന്നത് ഒഴിവാക്കാൻ ഗുണഭോക്താക്കളുമായി നേരിട്ടുള്ള സമ്പർക്കം നടത്തി ബോധവൽക്കരണം ശക്തമാക്കുകയാണ് പാർട്ടിയുടെ തന്ത്രം.