ആർട്ടിഫിഷ്യൽ ഇന്റലിജൻസിൻ്റെ പുരോഗതി അടുത്ത 12 മുതൽ 18 മാസത്തിനുള്ളിൽ യുഎസിലെ ദശലക്ഷക്കണക്കിന് വൈറ്റ് കോളർ തൊഴിലാളികൾക്ക് ജോലി നഷ്ടപ്പെടുത്തും.
മിഡ്-കരിയർ ഓഫീസ് ജീവനക്കാർ, കോൾ സെൻ്റർ ജീവനക്കാർ, മാർക്കറ്റർമാർ, കോഡർമാർ, മറ്റ് പ്രൊഫഷണലുകൾ എന്നിവർ നിലവിൽ ചെയ്യുന്ന ജോലികൾ AI ഓട്ടോമേറ്റ് ഏറ്റെടുക്കുമെന്നും ഇത് വൈറ്റ് കോളർ ജോലികളുടെ വൻതോതിലുള്ള വെട്ടിക്കുറക്കലിന് കാരണമാകുമെന്നും സംരംഭകനും മുൻ ഡെമോക്രാറ്റിക് പ്രസിഡൻ്റ് സ്ഥാനാർഥിയുമായ ആൻഡ്രൂ യാങ്പറഞ്ഞു. ഓട്ടോമേഷൻ തരംഗം ശക്തമാകുന്നതോടെ വരും മാസങ്ങളിൽ ദശലക്ഷക്കണക്കിന് വൈറ്റ് കോളർ തൊഴിലാളികൾക്ക് ജോലി നഷ്ടമാകും. കൂടാതെ ഒരു കമ്പനി ഇത് നടപ്പിലാക്കുന്നതിന് പിന്നാലെ അവരുടെ അവരുടെ എല്ലാ എതിരാളികളും അത് പിന്തുടരുമെന്നും യാങ് വ്യക്തമാക്കി. ജീവനക്കാരുടെ എണ്ണം കുറച്ചാൽ ഓഹരി വിപണി പ്രതിഫലം നൽകുകയും അങ്ങനെ ചെയ്തില്ലെങ്കിൽ ശിക്ഷിക്കുകയും ചെയ്യും എന്ന ഘട്ടമെത്തുന്നതോടെ ഈ രീതി ഒരു മത്സരമായി മാറുമെന്നും അദ്ദേഹം കൂട്ടിച്ചേർത്തു.
ഡാറ്റ വിശകലനം, റിപ്പോർട്ട് റൈറ്റിംഗ്, കോഡിംഗ്, ഉപഭോക്തൃ സേവനം തുടങ്ങിയ ജോലികൾ കൈകാര്യം ചെയ്യാൻ എഐ ഉപകരണങ്ങൾക്ക് കഴിയും എന്നതിനാൽ യുഎസിലെ 70 ദശലക്ഷം വൈറ്റ് കോളർ തൊഴിലാളികളിൽ 20-50% പേർക്കും വരും വർഷങ്ങളിൽ ജോലി നഷ്ടപ്പെടുമെന്ന് യാങ് കണക്കാക്കുന്നു.
തൊഴിൽ നഷ്ടം ഉപഭോക്തൃ ചെലവ്, ഭവന വിപണികൾ, നികുതി വരുമാനം എന്നിവ കുറയുന്നതിന് കാരണമാകുന്നതോടെ ഇത് പ്രാദേശിക സമ്പദ്വ്യവസ്ഥയെ തന്നെ ബാധിച്ചേക്കുമെന്നും യാങ് മുന്നറിയിപ്പ് നൽകുന്നു. ആഘാതം ലഘൂകരിക്കുന്നതിന് സാർവത്രിക അടിസ്ഥാന വരുമാനം, പുനർപരിശീലന പരിപാടികൾ, AI കമ്പനികൾക്ക് നികുതി ഏർപ്പെടുത്തൽ തുടങ്ങിയ നടപടികൾ ഏർപ്പെടുത്തേണ്ടി വരുമെന്നും യാങ് വ്യക്തമാക്കി.
