രാജസ്ഥാൻ റോയൽസ്​ ക്യാപ്​റ്റനായ മലയാളി വിക്കറ്റ്​ കീപ്പർ സഞ്ജു സാംസൺ ഐപിഎൽ ക്രിക്കറ്റിൽ പുതിയ ക്ലബ്ബിലേക്ക്​. 2027വരെ കരാറുണ്ടെങ്കിലും ടീം വിടാനുള്ള ആഗ്രഹം മാനേജ്​മെന്റിനെ അറിയിച്ചു. ഇക്കാര്യത്തിൽ ക്ലബ്ബിന്റെ നിലപാട്​ നിർണായകമാകും. നവംബറിനുള്ളിൽ തീരുമാനമുണ്ടാകും. രാജസ്ഥാൻ വിടുകയാണെങ്കിൽ ചെന്നൈ സൂ‍പ്പർ കിങ്​സ്​ സഞ്ജുവിനെ സ്വന്തമാക്കാൻ രംഗത്തുണ്ട്​. കൊൽക്കത്ത നൈറ്റ്​ റൈഡേ​ഴ്​സിനും താൽപ്പര്യമുണ്ടെന്നാണ്​ സൂചന. നിലവിൽ ബംഗളൂരുവിലെ ദേശീയ ക്രിക്കറ്റ്​ അക്കാദമിയിൽ പരിശീലനത്തിലാണ്​ സഞ്ജു. സെപ്​തംബർ 9ന്​ ആരംഭിക്കുന്ന ഏഷ്യാ കപ്പ്​ ട്വന്റി20ക്കുള്ള ഇന്ത്യൻ ടീമിൽ ഇടംപിടിച്ചേക്കും. ഇതിന്​ മുന്നോടിയായി കേരള ക്രിക്കറ്റ്​ ലീഗിൽ കൊച്ചി ബ്ലൂ ടൈഗേഴ്​സിനായി ചില മത്സരങ്ങളും കളിക്കും.

നിലനിർത്തുന്ന കളിക്കാരുടെ പട്ടിക ഐപിഎൽ സംഘാടകർക്ക്​ സമർപ്പിക്കേണ്ട അവസാന ദിവസം ഒക്​ടോബർ 31 ആണ്​. സഞ്​ജുവിനെ ഒഴിവാക്കുകയാണെങ്കിൽ നേരിട്ട്​ താരലേലത്തിൽ വിടാം. അല്ലെങ്കിൽ മറ്റ്​ ടീമുകളുമായി കൈമാറ്റം ചെയ്യാം. ഇത്​ രണ്ട്​ തരത്തിലാണ്​. 18 കോടി രൂപ വിലയുള്ള സഞ്ജുവിന്​ അതേ തുക നൽകി മറ്റുള്ള ക്ലബ്ബുകൾക്ക്​ സ്വന്തമാക്കാം. അതല്ലെങ്കിൽ സമാന മൂല്യമുള്ള മറ്റൊരു കളിക്കാരനെ കൈമാറിയും ധാരണയിലെത്താം.
കഴിഞ്ഞ സീസണുകളിൽ രാജസ്ഥാന്റെ മുഖമാണ്​ സഞ്ജു. 2013ൽ 18–ാം വയസ്സിൽ ഈ ഫ്രാഞ്ചൈസിയിലൂടെയായിരുന്നു മലയാളി ബാറ്റർ ഐപിഎല്ലിൽ അരങ്ങേറിയത്​. ഇന്ത്യൻ ക്രിക്കറ്റിലെ ശ്രദ്ധേയ താരമായുള്ള വളർച്ചയ്​ക്ക്​ ടീം നിർണായക പങ്കുവഹിച്ചു. 2016–17 സീസണുകളിൽ രാജസ്ഥാന്​ വിലക്കേർപ്പെടുത്തിയപ്പോൾ ഡൽഹി ഡെയർഡെവിൾസിനായി കളിച്ചു. 2018ൽ മടങ്ങിയെത്തി. 2021ൽ ക്യാപ്​റ്റനായി. 2022ൽ ടീമിനെ ഫൈനലിലേക്ക്​ നയിച്ചു. അവസാന പതിപ്പിലാണ്​ സഞ്ജുവും മാനേജ്​മെന്റും തമ്മിലുള്ള വിശ്വാസം നഷ്ടപ്പെട്ടത്​. ജോസ്​ ബട്​ലർ, ട്രെന്റ്​ ബോൾട്ട്​, യുസ്​വേന്ദ്ര ചഹാൽ തുടങ്ങിയ കളിക്കാരെ ഒഴിവാക്കിയതിൽ ക്യാപ്​റ്റന്​ അമർഷമുണ്ടായിരുന്നു എന്നാണ്​ റിപ്പോർട്ടുകൾ. പരിക്കുകാരണം 9 കളിയിൽ മാത്രമാണ്​ കളിച്ചത്​. റിയാൻ പരാഗിനായിരുന്നു പകരം ക്യാപ്​റ്റൻ ചുമതല. നാല്​ ജയം മാത്രം നേടി ഒമ്പതാം സ്ഥാനത്താണ്​ ടീം അവസാനിപ്പിച്ചത്​. രാജസ്ഥാനുവേണ്ടി ഏറ്റവും കൂടുതൽ മത്സരങ്ങൾ കളിച്ച താരമാണ്​. 11 സീസണിൽ 149 മത്സരങ്ങളിൽ 4027 റണ്ണടിച്ചു.

അശ്വിൻ ചെന്നൈ വിടുന്നു
പരിചയസമ്പന്നനായ സ്​പിന്നർ ആർ അശ്വിൻ ചെന്നൈ സൂപ്പർ കിങ്​സുമായി വേർപിരിയുന്നു. ടീം വിടാനുള്ള സന്നദ്ധത മുപ്പത്തെട്ടുകാരൻ അറിയിച്ചു. കാരണം വ്യക്തമല്ല. കഴിഞ്ഞ താരലേലത്തിൽ 9.75 കോടി രൂപയ്​ക്കാണ്​ വലംകൈയൻ സ്​പിന്നറെ ചെന്നൈ രണ്ടാംവട്ടം ടീമിലെത്തിച്ചത്​. ഐപിഎൽ ക്രിക്കറ്റിൽ 221 കളിയിൽ 187 വിക്കറ്റും 833 റണ്ണുമുണ്ട്​. ഡൽഹി ക്യാപിറ്റൽസ്​, പഞ്ചാബ്​ കിങ്​സ്​, രാജസ്ഥാൻ റോയൽസ്​ ടീമുകൾക്കായും കളിച്ചു.