കലുങ്ക് ചര്‍ച്ച പരമ്പരയെ ചൊല്ലിയുള്ള വിവാദങ്ങൾക്കിടെ, അതിനെതിരെ നടക്കുന്ന പ്രചാരണങ്ങൾക്ക് ശക്തമായ മറുപടിയുമായി കേന്ദ്രമന്ത്രി സുരേഷ് ഗോപി രംഗത്ത്.
കണ്ണൂരിൽ സി. സദാനന്ദൻ എംപിയുടെ ഓഫീസ് ഉദ്ഘാടനം ചെയ്ത ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
“ഇപ്പോഴത്തെ കേരളത്തിൽ എല്ലാം വളച്ചൊടിക്കുന്നതാണ് രീതി. പൂച്ചാണ്ടി കാണിച്ച് പേടിപ്പിക്കേണ്ട; ഞാൻ പറയാനുള്ളത് പറഞ്ഞുതന്നെ മുന്നോട്ടുപോകും,” എന്നായിരുന്നു സുരേഷ് ഗോപിയുടെ ഉറച്ച വാക്കുകൾ.
“ജനാധിപത്യ സംവാദത്തിന്‍റെ നൈർമല്യം കലുങ്ക് ചര്‍ച്ചകളിൽ കാണാം. ‘പ്രജ’ എന്ന് പറഞ്ഞാൽ എന്താണ് പ്രശ്നം?
പ്രജ എന്ന പദത്തിന്റെ അർഥം ആദ്യം പഠിക്കേണ്ടത് അനിവാര്യമാണ്,” എന്നും സുരേഷ് ഗോപി പറഞ്ഞു.
മിനിഞ്ഞാന്ന് നടന്ന കലുങ്ക് ചര്‍ച്ചയിൽ പറഞ്ഞതുപോലെ അതിന് ഒരു “സർജിക്കൽ സ്ട്രൈക്ക്” ഉണ്ടാകുമെന്ന് അദ്ദേഹം ആവർത്തിച്ചു.
ഈ ചര്‍ച്ചകൾക്ക് പങ്കെടുക്കുന്ന ജനങ്ങൾക്കു ഗുണകരമായിരിക്കുമെന്നും, അവരുമായി നടത്തുന്ന സംഭാഷണങ്ങൾ രാഷ്ട്രീയശുദ്ധിയും മനശുദ്ധിയും പ്രതിഫലിപ്പിക്കുന്നതാണെന്നും അദ്ദേഹം വ്യക്തമാക്കി.
“അവിടെയിരിക്കുന്നവർക്കും സംസാരിക്കുന്നവർക്കും ശുദ്ധമായ മനസ്സാണ് അനിവാര്യം.
ഈ നൈർമല്യമാണ് എതിരാളികളെ ഭയപ്പെടുത്തുന്നത്. അതാണ് അവരുടെ വ്യാകുലത,” എന്നും അദ്ദേഹം കൂട്ടിച്ചേർത്തു.
അദ്ദേഹം മുന്നോട്ടുവെച്ച മറ്റൊരു പ്രധാന അഭിപ്രായം കണ്ണൂരിലെ രാഷ്ട്രീയ സ്ഥിതിഗതികളെക്കുറിച്ചായിരുന്നു.
സി. സദാനന്ദൻ എംപിയുടെ തിരഞ്ഞെടുപ്പ് വിജയവും പാർലമെന്റിലെ സാന്നിധ്യവും കണ്ണൂരിലെ പരമ്പരാഗത രാഷ്ട്രീയ ബലകേന്ദ്രങ്ങളിൽ പ്രതിസന്ധി സൃഷ്ടിച്ചുവെന്നായിരുന്നു സുരേഷ് ഗോപിയുടെ വിലയിരുത്തൽ.
“സി. സദാനന്ദൻ എംപിയുടെ പാർലമെന്റ് അംഗത്വം കണ്ണൂരിലെ ജയരാജൻമാരിൽ അങ്കലാപ്പ് ഉണ്ടാക്കിയിരിക്കുന്നു.
കണ്ണൂരിലേക്ക് കയ്യെത്തിപ്പിടിക്കാൻ ഇതാണ് ആദ്യത്തെ വാതിൽ തുറക്കൽ,” എന്നും അദ്ദേഹം പറഞ്ഞു.
സദാനന്ദൻ എംപിയുടെ പുതിയ ഓഫീസ് ഉടൻ ഒരു കേന്ദ്രമന്ത്രിയുടെ ഓഫീസ് ആയി മാറട്ടെയെന്നും, തന്നെ ഒഴിവാക്കി സി. സദാനന്ദനെ മന്ത്രിയാക്കിയാൽ അതിൽ തന്നെ സന്തോഷമുണ്ടാകുമെന്നും സുരേഷ് ഗോപി പ്രതികരിച്ചു.
“ഞാൻ ഒഴിവായി സി. സദാനന്ദൻ കേന്ദ്രമന്ത്രിയായാൽ അതിൽ എനിക്ക് സന്തോഷം മാത്രമേയുള്ളു,” എന്നായിരുന്നു അദ്ദേഹത്തിന്റെ വാക്കുകൾ.
സിപിഎം നേതാവ് എം.വി. ജയരാജന്റെ “സി. സദാനന്ദനെ എംപിയായി വിലസാൻ അനുവദിക്കില്ല” എന്ന പരാമർശത്തിന് മറുപടിയായി സുരേഷ് ഗോപി കടുത്ത വിമർശനവുമുയർത്തി.
“ഒന്നിനെയും ഞാൻ വെറുതെ വിടില്ല. ജനങ്ങൾക്കായി ആരംഭിച്ച ചര്‍ച്ചകളിൽ ജനങ്ങളുടേതായ ആത്മാർത്ഥതയുണ്ട്. അതാണ് ഇപ്പോൾ എതിരാളികളെ ഭയപ്പെടുത്തുന്നത്,” എന്നും സുരേഷ് ഗോപി പറഞ്ഞു.
കലുങ്ക് ചര്‍ച്ചകളെച്ചൊല്ലിയുള്ള വിമർശനങ്ങൾ ശക്തമായിക്കൊണ്ടിരിക്കുമ്പോഴും സുരേഷ് ഗോപി അതിൽ നിന്ന് പിൻമാറില്ലെന്ന് വ്യക്തമാക്കിയിരിക്കുന്നു.
രാഷ്ട്രീയ സുതാര്യതയും പൊതു പ്രവർത്തനത്തിലെ ശുദ്ധിയും ഉറപ്പാക്കാനുള്ള തന്റെ ശ്രമം തുടരുമെന്നും അദ്ദേഹം വ്യക്തമാക്കി.
