ക്രിക്കറ്റിന്റെ ചരിത്രത്തിൽ മറ്റൊരു വലിയ മാറ്റത്തിന് വേദിയൊരുങ്ങുകയാണ്. ടെസ്റ്റ് ക്രിക്കറ്റിന്റെ ആഴവും ട്വന്റി20 ക്രിക്കറ്റിന്റെ വേഗതയും ചേർന്നൊരു പുതിയ ഫോർമാറ്റ് ഉടൻ എത്തുന്നു — “ടെസ്റ്റ് 20” എന്ന പേരിലാണ് ഈ പുതിയ രൂപം പരിചയപ്പെടുത്തുന്നത്.
സ്പോർട്സ് വ്യവസായിയായ ഗൗരവ് ബഹിർവാനിയുടെ വൺ വൺ സിക്സ് നെറ്റ്‌വർക്ക് ആണ് ഈ പുത്തൻ ആശയത്തിന് പിന്നിൽ.
താരങ്ങളായ മാത്യു ഹൈഡൻ, എ.ബി. ഡിവില്ലിയേഴ്സ്, ഹർഭജൻ സിംഗ്, സർ ക്ലൈവ് ലോയ്ഡ് എന്നിവരാണ് ഈ സംരംഭത്തിന്റെ ഉപദേശക സംഘം.
ക്രിക്കറ്റിന്റെ ഭാവിയെ കൂടുതൽ ആകർഷകവും സാങ്കേതികമായും മുന്നോട്ട് നയിക്കാനാണ് ഇവരുടെ സംയുക്ത ശ്രമം. പുതിയ ഫോർമാറ്റ് പ്രധാനമായും 13 മുതൽ 19 വയസ്സുവരെയുള്ള യുവതാരങ്ങളെ ലക്ഷ്യമിട്ടാണ് രൂപകൽപ്പന ചെയ്തത്. യുവജനങ്ങൾക്കിടയിൽ ടെസ്റ്റ് ക്രിക്കറ്റിന്റെ തന്ത്രങ്ങൾ പഠിക്കാനും, ടി20യുടെ ആവേശം ആസ്വദിക്കാനും ഒരുമിച്ച് അവസരം നൽകുക എന്നതാണ് ലക്ഷ്യം.
ആദ്യ ടെസ്റ്റ് 20 ടൂർണമെന്റ് അടുത്ത വർഷം ജനുവരി 2026-ൽ ഇന്ത്യയിൽ നടക്കും. ഈ ടൂർണമെന്റിൽ ആറ് ഫ്രാഞ്ചൈസികളായിരിക്കും പങ്കെടുക്കുക. അതിൽ മൂന്നു ടീമുകൾ ഇന്ത്യയിൽ നിന്നായിരിക്കും. ബാക്കി മൂന്ന് ടീമുകൾ ദുബായ്, ലണ്ടൻ, യുഎസിലെ ഒരു നഗരം എന്നിവിടങ്ങളിലായിരിക്കും ആസ്ഥാനം. ഓരോ ഫ്രാഞ്ചൈസിയുടെയും മുഖച്ഛായയായിരിക്കും ഒരു സെലിബ്രിറ്റി ‘സ്റ്റാർ കിഡ്’, അത് യുവ പ്രേക്ഷകരെ കൂടുതൽ ആകർഷിക്കാനുള്ള നീക്കമായി കാണപ്പെടുന്നു.
ടൂർണമെന്റിന്റെ രണ്ടാം സീസണിൽ വനിതകളുടെ ടെസ്റ്റ് 20 ലീഗും ആരംഭിക്കുമെന്ന് സംഘാടകർ അറിയിച്ചു. ക്രിക്കറ്റിന്റെ ഇതുവരെയുള്ള മൂന്നു പ്രധാന ഫോർമാറ്റുകൾ — ടെസ്റ്റ്, വൺഡേ (50 ഓവർ), ട്വന്റി20 (20 ഓവർ) — എല്ലാം ആരാധകർക്ക് വ്യത്യസ്ത അനുഭവങ്ങൾ നൽകി. അതിൽ നാലാമത്തെ പുതിയ രൂപമായി ടെസ്റ്റ് 20 കണക്കാക്കപ്പെടുന്നു.
പേരുപോലെ തന്നെ, 20 ഓവർ വീതമുള്ള നാല് ഇന്നിങ്സുകളിലായി ഈ മത്സരം നടക്കും. അഥവാ, ആകെ 80 ഓവർ, ടെസ്റ്റ് ക്രിക്കറ്റിനെപ്പോലെ ഇരു ടീമുകൾക്കും രണ്ട് ഇന്നിങ്സുകൾ വീതം ലഭിക്കും. മത്സരത്തിന് ജയം, തോൽവി, സമനില എന്നീ ഫലങ്ങളുണ്ടാകും.
പുതിയ ഫോർമാറ്റ് ടെസ്റ്റിന്റെ തന്ത്രപരമായ ആഴവും, T20യുടെ വേഗതയും ഒരുമിപ്പിക്കുന്നതാണ്. ഉദാഹരണത്തിന്, ബൗളിംഗ് ചേഞ്ചുകൾ, ഡിക്ലറേഷൻ, ഫോളോ-ഓൺ പോലുള്ള ഘടകങ്ങൾ നിലനിൽക്കും, എന്നാൽ അവ ചുരുങ്ങിയ ഓവർ പരിധിയിൽ അനുയോജ്യമായി പരിഷ്കരിക്കും.
“ക്രിക്കറ്റ് ലോകം തുടർച്ചയായ പരിണാമത്തിലാണ്. യുവജനങ്ങളെ ടെസ്റ്റ് ക്രിക്കറ്റിലേക്കും ആകർഷിക്കാനുള്ള മികച്ച മാർഗമാണ് ടെസ്റ്റ് 20,” എന്ന് മാത്യു ഹൈഡൻ വ്യക്തമാക്കി. എ.ബി. ഡിവില്ലിയേഴ്സ് അഭിപ്രായപ്പെട്ടു: “ഇത് ഗെയിമിന്റെ തന്ത്രപരമായ ഘടകങ്ങളും എന്റർടെയിൻമെന്റും കൂട്ടിച്ചേർക്കുന്ന മനോഹരമായ ആശയമാണ്. ഭാവിയിൽ ക്രിക്കറ്റിന്റെ വളർച്ചക്ക് ഇത് വഴിതെളിക്കും.”
ടെസ്റ്റ് 20 ലീഗ് ആരംഭിച്ചതോടെ, ക്രിക്കറ്റിന്റെ ഭാവി കൂടുതൽ വിപുലമായ രീതിയിൽ മുന്നേറുമെന്ന് വിദഗ്ധർ കരുതുന്നു. ക്രിക്കറ്റ് ആരാധകർക്ക് ഒരേ സമയം ടെസ്റ്റിന്റെ ഗൗരവവും, ട്വന്റി20യുടെ ആവേശവും നൽകുന്ന പുതിയ അനുഭവമായി ഇത് മാറും.