ദീപാവലി ആഘോഷങ്ങൾക്കിടെ രാജ്യതലസ്ഥാനത്ത് വായു മലിനീകരണം അതിരൂക്ഷമായി. പലയിടങ്ങളിലും മലിനീകരണ തോത് 400 കടന്ന് അതീവ ഗുരുതരമായ അവസ്ഥയിലെത്തി. നഗരത്തിൽ വായു ഗുണനിലവാര സൂചികയിൽ (AQI) ശരാശരി 270 ആണ് രേഖപ്പെടുത്തിയത്.
സുപ്രീം കോടതിയുടെ സമയപരിധി മറികടന്നും പടക്കം പൊട്ടിച്ചുള്ള ആഘോഷങ്ങൾ തുടരുന്നതാണ് മലിനീകരണം വർധിക്കാൻ പ്രധാന കാരണം. അക്ഷർധാമ് (426), ആനന്ദ് വിഹാർ (416) എന്നിവിടങ്ങളിൽ മലിനീകരണ തോത് 400 കടന്നു. ഇത് അനുവദനീയമായ അളവിനേക്കാൾ എട്ട് ഇരട്ടിയിലധികം വരുമെന്നത് ആശങ്ക വർദ്ധിപ്പിക്കുന്നു. കൂടാതെ, നഗരത്തിലെ ഒൻപത് പ്രദേശങ്ങളിൽ മലിനീകരണ തോത് 300-ഉം കടന്നു. സുപ്രീം കോടതി നാളെയും മറ്റന്നാളും നിശ്ചിത സമയങ്ങളിൽ പടക്കം പൊട്ടിക്കാൻ അനുമതി നൽകിയിരിക്കുന്നതിനാൽ വരും ദിവസങ്ങളിൽ സ്ഥിതി കൂടുതൽ വഷളായേക്കാം.
അതേസമയം, വായു മലിനീകരണം കുറയ്ക്കുന്നതിനായി ക്ലൗഡ് സീഡിംഗിലൂടെ കൃത്രിമ മഴ പെയ്യിക്കാനാണ് ഡൽഹി സർക്കാർ നീക്കം നടത്തുന്നത്. ഇതിനോടകം നാല് തവണ പരീക്ഷണ പറക്കലുകൾ പൂർത്തിയാക്കി. കേന്ദ്ര കാലാവസ്ഥാ നിരീക്ഷണ കേന്ദ്രം അനുമതി നൽകുന്ന മുറയ്ക്ക് ക്ലൗഡ് സീഡിംഗ് നടത്തുമെന്ന് സർക്കാർ അറിയിച്ചു.
